[IES滿分心得] 熱門IES題目(器官捐贈) + 高分策略

每位中五同學要諗一個特別嘅 IES 題目並唔容易,小編已經聽過「IES題目做咩好?有咩好嘅IES題目推介?」不下一百次,所以之前寫咗一篇文章:有助你突圍而出的IES題目建議,入面有啲唔容易過時,又唔公廁嘅 IES 題目俾同學參考。

好多同學以為做 IES 熱門題目,太多比較之下就唔會高分(有睇過小編嘅 IES 精讀筆記 嘅同學,就應該會知道小編唔建議同學做太過公廁嘅題目,小編喺筆記入面有提醒同學避免邊類題目架~)但係要諗一條特別嘅 IES 題目又唔容易。咁你又有冇諗過同其他同學做同一條常見嘅 IES 題目,然後喺眾人之中突圍而出呢?

今次小編會為大家建議一啲 熱門 IES題目(呢啲題目應該會喺 2019、2020 呢兩年都仲係咁熱門嘅)再教大家如何喺常見題目入面突圍而出,爭取高分嘅策略

熱門IES題目:預設默許器官捐贈

DSE Liberal Studies IES Organ Donation
香港中學文憑試 通識 IES 器官捐贈
IES題目建議:預設默許器官捐贈

IES題目背景簡介

香港嘅器官捐贈採用「自願捐贈」 制度,但係市民嘅自願登記率一直偏低。 當等候人體器官移植嘅人數眾多嘅時候,人體器官嘅供應遠不及需求,因此有人提出香港採用「預設默許器官捐贈」制度,除非市民主動登記退出器官捐贈名冊,否則市民會被視為預設默許成為器官捐贈者。

P.S. 其中一份考評局 IES 樣本係同器官捐贈有關嘅,嗰條題目係「探討本港中學生對遺體器官捐贈的接受程度」,同學可以喺 HKEAA 網站嘅 2017 年 IES 範本 示例三度搵到。

當然遺體器官捐贈係個比較恆常嘅通識議題,而「預設默許器官捐贈」明顯係近期 2019 年比較熱門嘅 IES 題目。

IES高分策略:歸納持分者意見

喺 IES 報告 Part C (深入解釋議題 in-depth explanation of the issue) 嘅部分,大部同學只係會搜集網上資料,然後分別列出每個持分者嘅意見就算。例如係:

  • 食物及衞生局局長陳肇始、醫院管理局前主席梁智鴻都支持香港實行預設默許器官捐贈,因為呢個制度可以提高香港嘅器官捐贈率,舒緩供移植器官不足嘅問題
  • 等待換肝嘅肝硬化病人邱鷺文、邱先生嘅妻子都支持呢個制度,因為預設默許器官捐贈可以令更多等候器官移植嘅人受惠
  • 前食物及衞生局局長高永文就指出應該器官捐贈應屬自願性質,要提高器官捐贈率,應該改變市民嘅思想,而唔係強推行預設默許器官捐贈,因此佢唔支持呢個制度。

就以上唔同持分者嘅立場同看法,有同學會用以下方式去列出所收集番嚟嘅資料:

持分者立場及看法
食物及衞生局局長陳肇始支持 (+解釋看法)
醫院管理局前主席梁智鴻支持 (+解釋看法)
等待換肝嘅肝硬化病人邱鷺文支持 (+解釋看法)
等待換肝嘅肝硬化病人邱鷺文的妻子支持 (+解釋看法)
前食物及衞生局局長高永文反對 (+解釋看法)

而同學要喺 IES 爭取高分數嘅話,就可以喺度展示高階嘅歸納技巧,將相同立場、看法相似嘅持分者歸納。以下有個例子俾大家參考:

持分者 (已歸納)持分者 (未歸納)立場及看法
政府及醫院管理機構食物及衞生局局長陳肇始
醫院管理局前主席梁智鴻
支持
(+解釋看法)
等候器官移植病人及家屬等待換肝嘅肝硬化病人邱鷺文
等待換肝嘅肝硬化病人邱鷺文的妻子
支持
(+解釋看法)

將相同立場嘅持分者歸納,可以展示到同學除咗做資料搜集之外,仲識得運用、分析資料,係考評局同埋老師都會好欣賞嘅能力嚟。同學能夠適當咁歸納資料嘅話,無疑會令你嘅 IES 報告爭取更高嘅分數。

歸納係同學喺 IES 同埋通識科考試入面,都係好重要嘅一個技巧。除咗歸納持分者意見之外,同學仲可以從好多唔同嘅角度歸納資料內容。唔想錯過通識高分技巧的話,同學可以參考吓小編嘅通識5**考試技巧筆記,入面嘅內容會幫到同學考通識科,部分技巧亦都適用於寫一份高分 IES 報告嘅。而小編嘅 IES精讀筆記 就收錄咗小編 IES 滿分嘅心得、作答框架同方法,教大家更加多老師未必會教嘅 IES 高分技巧。

另外小編嚟緊會陸續寫更多嘅文章,為大家建議一啲 2019 熱門 IES 題目,同埋教大家如何喺常見 IES 題目入面,運用唔同嘅技巧爭取高分數。唔想錯過小編嘅新文章的話,記得碌到落底訂閱 www.hkdsegayau.com 嘅文章!

你可能會有興趣…