「小編，我今年中三升中四選科好迷茫… 應該點樣揀科？應該點樣配搭？高中讀文科、理科、商科出路分別係點？」
讀緊中三嘅你即將踏入高中，覺得緊張、迷茫係好正常嘅事。
小編認為中三選科最重要嘅三個考慮因素包括：出路、興趣、能力。
小編 hkdsegayau 喺呢篇文章就會逐一解釋文科、理科、商科嘅出路，以及詳細嘅中三選科策略。
呢篇文章嘅內容包括：
1. 文科出路
小編分析讀文科嘅出路之前，想先歸納一下屬於文科嘅高中科目。
文科科目
- 地理 Geography
- 歷史 History
- 中史 Chinese History
- 中國文學 Chinese Literature
- 英國文學 Literature in English
文科出路比理科窄？
傳統思想下，唔少人認為讀文科出路窄、讀理科出路闊，因而蜂湧去讀物理 Physics、化學 Chemistry、生物 Biology 等等嘅科目。
根據小編嘅個人觀察，其實文科「乞食」、理科「吃香」嘅說法未必再適用於而家嘅社會。
小編中學讀 Phy、Chem、Bio 三科理科，而家喺香港大學讀緊 BBA(Law) & LLB。
小編身邊嘅朋友，有唔少都係中學讀文科出身 (甚至一科理科都冇讀) ，同樣可以入到好好嘅大學學科、大學畢業後搵到收入可觀嘅工作。
文科出路 — 大學學科選擇
小編個人認為，真真正正決定同學出路嘅，係同學喺大學時期所修讀嘅科目。
而除咗理科之外，香港各所大學嘅大部分學科都無要求同學中學嗰陣要讀咩選修科。
所以，中三選科選擇咗文科嘅同學，考 DSE 後升讀大學嘅選擇依然好多。
(a) 中學畢業出路：大學讀商科
大部分嘅大學商科都無要求同學中學嗰陣修讀相關科目，而小編自己中學讀 Phy、Chem、Bio 三科理科，大學嗰陣讀番商科都唔算太難跟上進度。
舉幾個例子，修讀文科嘅同學中學畢業後，想讀商科的話可以選擇：
- 香港科技大學 工商管理學士 (環球商業管理)
- HKUST: BBA in Global Business (簡稱 Gbus)
- 香港中文大學：環球商業學
- CUHK: Global Business Studies (簡稱 GBS)
- 香港大學：工商管理學學士 (國際商業及環球管理)
- HKU: Bachelor of Business Administration in International Business and Global Management (簡稱 IBGM)
(b) 中學畢業出路：大學讀文科
而高中修讀文科嘅同學，大學讀番文科當然無問題。
舉幾個例子，修讀文科嘅同學中學畢業後，想讀文科的話可以選擇：
- 香港大學、香港中文大學、香港城市大學：法學士
- HKU、CUHK、CityU: Bachelor of Laws
- 各大專院校：文學士
- Bachelor of Arts
或者同學可以選擇大學修讀其他科目，例如：社會科學 Social Sciences、社會工作學士 Social Work、心理學 Psychology 等等。
2. 理科出路
至於中三選科時，同學可以選擇嘅理科主要分為五科：
理科科目
- 物理 Physics
- 化學 Chemistry
- 生物 Biology
- 科學：組合科學 Combined Science
- 科學：綜合科學 Integrated Science
理科出路較廣？
可以話係，又可以話唔係。
如果真係要話理科出路較廣的話，小編覺得中三選科揀讀理科，比起高中揀讀文科，俾到同學嘅額外出路就只係大學嘅理科而已。
因為大學嘅科學、理科、醫療相關嘅科目，大部分都要求同學高中嗰陣修讀 Phy、Chem、Bio 當中至少一科理科。
舉個例，以下類別嘅大學學科都會要求同學高中修讀理科科目：
| 大學學科 | 高中選修科目要求 |
| 工程學 Bachelor of Engineering | 物理 Physics 或組合科學 Combined Science |
| 理學士 Bachelor of Science | 物理 Physics、化學 Chemistry、生物 Biology 組合科學 Combined Science 或綜合科學 Integrated Science |
| 內外全科醫學士 (簡稱MBBS) Bachelor of Medicine and Bachelor of Surgery | 化學 Chemistry 或組合科學 Combined Science |
至於其他科學、理科、醫療相關嘅大學學科，雖然部分科目未必將高中理科列入必讀嘅入學要求，然而同學高中修讀理科，理科科目有機會喺大學入學計分嗰陣，佔較高嘅比重，令同學更容易受心儀學系取錄。
舉幾個例子：
| 大學學科 | 佔分較重的選修科 |
| 職業治療學(榮譽)理學士學位 BSc (Hons) in Occupational Therapy | 物理 Physics 生物 Biology 或組合科學 Combined Science |
| 物理治療學(榮譽)理學士學位 BSc (Hons) in Physiotherapy | 物理 Physics 生物 Biology 或組合科學 Combined Science |
| 放射學(榮譽)理學士學位 BSc (Hons) in Radiography | 物理 Physics 化學 Chemistry 生物 Biology 或組合科學 Combined Science |
點先知道大學收生要求？
說真的，香港大專院校幾十幾百個學科，小編自己都唔會一一了解到每個學科嘅收生要求、佔分較重嘅選修科係咩。
小編之所以喺呢篇文章列到不同大學、不同學科嘅收生要求，係因為小編撰寫呢篇中三選科策略之前，自己都做咗資料搜集。
小編會建議你到 JUPAS 網站，了解多啲大學學科收生要求。
第一步：到 JUPAS 網站
第二步：碌到落底搵 “Programme Search”
第三步：輸入大學學科嘅關鍵字眼
第四步：瀏覧學科收生要求
同學揀好心儀嘅大學學科之後，就可以詳細睇睇科目嘅收生要求。
以物理治療 Physiotherapy 為例，小編於 2020年3月從 JUPAS 網站擷取嘅資訊係：
There is no compulsory subject requirement.
物理治療没有必讀的選修科目。
Preferred subjects with the highest weighting for admission score calculation include:
佔分較重的科目包括：
- Chinese 中文;
- English 英文;
- Biology 生物;
- Physics 物理; and
- Combined Science with Biology and Physics 組合科學
由 JUPAS 網站可見，物理治療呢科並無必讀嘅選修科目，而同學修讀 Physics 物理、Biology 生物，或組合科學的話，呢幾科所佔嘅比重會較高。
所以，有興趣讀物理治療嘅同學可以考慮修讀 Physics 物理、Biology 生物科。
3. 商科出路
高中嘅部分科目 (例如經濟科 Econ) 較難歸類為文科或商科，而小編喺呢篇文章嘅商科列表如下：
商科科目
- 經濟 Economics
- 企業、會計與財務概論 Business, Accounting and Financial Studies (簡稱企會財或BAFS)
高中嘅商科較少會係大學學科嘅收生要求之一，因此同學中三選擇讀商科，中學畢業嘅出路依然好廣。
以小編嘅經歷為例，小編中學讀 Phy、Chem、Bio (一科商科都冇讀)，升上大學之後有讀過 Introduction to Financial Accounting、Introductory Microeconomics、Introductory Macroeconomics 等等嘅課程。
由於小編中學冇商科底子，大學讀番商科一開始係會有點難上手，不過慢慢都會追得上進度。
4. 中三選科策略
最後最後，小編 hkdsegayau 俾中三同學嘅小小建議：
(a) 出路因素
條條大路通羅馬，小編認為中三嚟緊要選科嘅你唔需要過於擔心出路問題。
有興趣/可能/唔排除會讀理科、醫療學科嘅你可以先讀住化學 (Chem) 或者生物 (Bio) 嘅其中一科、或者兩科都讀曬先。
如果你十分討厭科學，又好肯定自己大學唔會讀理科的話，你可以放心揀高中只讀文科、商科。
(b) 興趣因素
興趣十分十分重要。
唔好因為屋企人想你讀某某科、大家都讀某某科而跟住讀。
高中三年，要對住一科你唔鍾意嘅科讀三年，你會讀得好辛苦。
況且小編覺得，你有興趣讀先會有動力去讀，先會讀得好。
(c) 能力因素
除咗出路、興趣之外，中三同學選科亦都應該考慮埋能力嘅因素。
舉個例子，同學數理方面麻麻、討厭數字的話，小編唔建議你讀物理 Physics, 因為你會讀得好辛苦。
另一方面，討厭背書嘅你就唔應該讀中史、歷史、生物 Biology 呢啲科目。
5. 有助中三選科的實用網站
小編有個小小嘅建議 — 你可以睇吓不同嘅網上資訊，了解多啲高中不同科目嘅內容！
- JUPAS 網站：上文提及到，你可以上 JUPAS 網站，睇吓啲大學學科通常要求同學讀啲咩選修科目；
- 考評局高中科目資訊：考評局官方網站詳細列咗高中科目每一科嘅課程內容、評核方式；
- DSE Past Paper 資源：小編覺得最快了解高中科目讀啲咩、考啲咩嘅方法，就係睇嗰科嘅歷屆試題，小編已經整合咗 DSE、CE、AL Past Paper 俾你哋啦~
- DSE 溫習筆記：DSE 筆記除咗幫高中同學溫習，更有效咁理解、消化每課嘅內容之外，亦都可以幫助中三嘅你了解一下每科其實要讀啲咩~
小編 hkdsegayau 今日嘅分享係咁多，希望幫到中三選科嘅你！
延伸閱讀：
訂閱免費 DSE 資源
不想錯過 DSE 考生必讀資訊、想獲得免費 DSE 學習資源？
hkdsegayau 已為你準備好！只須填妥 DSE 資源訂閱表格，便會透過電郵定期收到免費 DSE 學習資源。
這是完全免費的！
關注我們的 Instagram 動態
hkdsegayau 在 Instagram 定期分享 DSE 讀書心得、實用英文生字。
超過 14,000 位考生已經追蹤 hkdsegayau 的 Instagram 專頁了，你也不要錯過喔！
DSE 溫習筆記
與其自己花數十小時鑽研厚厚的教科書，直接溫習 hkdsegayau 的重點筆記一定更具成本效益。
現在的你願意為你的 DSE 成績、你的將來而投資嗎？