發佈日期:

[DSE中文卷二] 5**作文技巧分享

「小編,我想問有冇 DSE 中文卷二作文技巧可以講吓?」

其實小編自己比較擅長嘅寫作文體係議論文,較少會寫記敘抒情文。

不過,呢篇文章會講解嘅係適用於各種文體嘅 DSE 中文寫作技巧。無論同學擅長於考試寫作議論文,定係記敍抒情文,都可以參考以下嘅中文寫作技巧。

以下嘅中文作文技巧看似簡單,不過呢啲係最基本,亦都係十分十分之重要嘅考試技巧。記得睇到最尾呀!

1. 選擇適合自己的作文文體

首先,最最最重要嘅一點,係同學要選擇適合自己嘅作文文體。

最大路嘅兩種文體係:記敍抒情文、議論文。

點解要揀定一種寫作文體?

高中三年時間,同學能夠真真正正寫一篇中文作文、交俾老師改文嘅機會唔多。

換句話說,同學練習作文、收到評語,並且作出改善同進步嘅機會亦都唔多。

所以,小編建議同學考 DSE 之前,越早揀定一種文體越好。

揀好記敍抒情文或議論文後,同學就可以專注培養語感、文筆,或者係專注儲例子、論據,令自己對 DSE 考試嘅準備更充足。

如何選擇適合自己的作文文體?

簡單嚟講,同學可以根據自己寫作記敍抒情文嘅能力,去決定自己適合寫作邊一類文體。

記敍抒情文多數要求同學記敍、描寫兩者兼備,同學作文嘅時候要令文章具備故事性、描述人物行為、思想細膩,同學所寫嘅文筆、修辭亦相對要較出色。

假若同學有信心做達到以上要求的話,記敍抒情文會非常適合你。

至於小編自己… 小編嘅想像力較弱,亦都唔識寫引人入勝、有齊起承轉合嘅故事,文筆亦都唔係特別靚。

所以,小編會選擇避免寫作記敍抒情文,投放更多時間準備議論文。

記抒、議論文兩樣都唔叻,應該點揀?

小編中四嘅時候,都有掙扎過 — 應該寫記敍抒情,定係議論文好?

當時小編都決定唔到,所以學校寫試嗰陣,小編上學期考試寫記敍抒情,下學期考寫試寫議論文。

結果,小編發現自己考試嗰陣完全冇諗唔到一篇扣題、具故事性嘅文章,反而係引番平日睇書、補習學番嚟嘅事例、史例、語例,寫落議論文攞到相對較好嘅成績。

如果同學面對寫記敍抒情、議論文嘅抉擇,同學可以參考小編嘅做法,試一試自己較擅長嘅文體。

小編個人建議:寫議論文

假如同學無特別偏好,或者寫作兩種文體嘅表現相約的話,小編會建議同學寫議論文。

小編建議同學寫議論文嘅原因有兩個:

  1. 文筆並唔係一朝一夕就可以培養番嚟。相比起花時間去培養語感、訓練文筆,儲例子會更快、更高成本效益。
  2. 同學儲落嘅例子,除咗適用於卷二作文之外,亦有機會喺卷四說話、小組討論嗰陣用得著,一舉兩得。

小編準備咗一份中文百搭例子筆記《事例篇》,收錄咗一系列嘅高質百搭例子,對同學嘅卷二、卷四會有幫助。

2. 落筆前先審題

同學到咗 DSE 考試,打開試卷之後,第一步係審題。

所謂審題,當然並唔係「睇一次條題目」咁簡單。更重要嘅係,同學應該仔細睇清楚題目嘅每一個字,認真諗清楚題目背後嘅要求。

審題示例

以2017年中文作文題目嘅第一題為例:

試撰寫文章一篇,並以「自此之後,我終於解開了心結。」為末句收結全文。

驟眼看,題目僅僅係要求同學以題目提供嘅句子作為文章末句,而同學喺內文應該記述一個解開心結嘅故事。

不過,仔細審題嘅同學會留意到「終於」二字。

「終於」暗示咗故事主人翁嘅心結,應該係好耐、好耐都未解開嘅心結。

倘若同學審題不清,忽略咗「終於」二字,所寫嘅故事內容就好容易會離題。

3. 撰寫寫作大綱

考試期間,唔少同學決定好寫邊一條題目之後,就急於落筆作文,忽略咗寫大綱呢個步驟。

同學可能會問:其實寫作大綱有咩用?係咪一定要寫?

好重要,一定要寫。

寫作大綱可以幫你鋪排好每一段嘅要點,令文章結構更嚴謹、內容更扣題,避免隨心所欲寫寫吓離題嘅情況出現。

除此之外,同學落筆前寫大綱嘅時候可以諗定每一段用咩寫作手法、例子,令文章運用嘅寫作手法更多元化。

議論文寫作大綱

記敍抒情文嘅寫作大綱因故事內容而異,而議論文嘅寫作框架變化較小。

以下係小編寫議論文嘅大綱框架,同學可以參考一下:

引言 + 立場

論點一:[列出論點]

  • 例子 [列出例子]
  • 論證手法 [列出論證手法]

論點二:[列出論點]

  • 例子 [列出例子]
  • 論證手法 [列出論證手法]

論點三:[列出論點]

  • 例子 [列出例子]
  • 論證手法 [列出論證手法]

總結 + 昇華 (第4部分會詳細解釋)

議論文常用的論證手法

小編讀中學嗰陣,中文科老師成日叫我哋作文用多啲唔同嘅論證手法。

作文常用嘅論證手法包括:

  • 舉例論證:事例、史例、語例、設例
  • 引用論證
  • 對比論證

不過,小編留意到最易學、易記、易用嘅都係舉事例、名人例子,因此唔少同學都會用事例嚟佐證。

所以小編整合咗自己所學嘅事例,編寫咗一份中文百搭例子筆記《事例篇》俾同學參考。

4. 深化主題及昇華

深化文章主題,做好昇華部分,係中文卷二奪星嘅關鍵。

昇華係咩嚟?

簡單嚟講,同學考試寫嘅每一篇文章,都應該論述一啲道理、一啲反思。

同學將文章內容深化,由故事情節或文章論點,帶出高階嘅道理,作出反思,會令文章更有深度。

例如,同學可以透過文章,帶出自己對文章主題更深入嘅看法(例如:2018年題目嘅談知己、談敵人)或者從記敍抒情文嘅故事內容當中,帶出對人生、社會等等高層次嘅反思。

點解要做昇華?

正如上面所提及到,昇華部分做為中文卷二作文嘅奪星關鍵。想要卷二攞到五級或以上嘅成績,做好昇華係同學不可不學嘅考試技巧。

呢個高階嘅寫作技巧亦都唔容易拿捏得到。

小編喺呢篇文章未有時間深入解釋深化主題、昇華嘅詳細方法,不過小編會建議同學報讀中文補習班,由補習老師詳細教授文章立意、昇華嘅要訣。

中文應該補邊個?同學可以訂閱小編 hkdsegayau 嘅免費 DSE 資源,之後小編會將自己嘅補習史、補習老師分析,同埋其他免費資源分享俾你。

5. DSE 卷二作文題目趨勢分析

根據歷屆 DSE 中文卷二嘅作文題目,每年嘅三條作文題目裹面,出題普遍包括以下三類文體:

  1. 記敍抒情文
  2. 議論文
  3. 開放式題目 (例如 2016 年嘅「我在 _____ 中找到快樂」)

近年,考評局嘅出題越嚟越開放。例如:並以「自此之後,我終於解開了心結。」為末句收結全文。2018年嘅談知己、談敵人,題目偏向開放式,同學嘅發揮空間相對較大。

而2019年卷二嘅第一題則要求同學以「這一句話,我會記上一輩子」為文章句首,撰寫一篇記敍抒情文。

雖然考評局出題題型走向開放模式,不過每年嘅題目文體嘅分佈依然係:記敍抒情文、議論文、開放式題目各一題。

所以,小編依然建議同學選定一類自己擅長嘅文體,加緊操練。

延伸閱讀:


訂閱免費 DSE 資源

不想錯過 DSE 考生必讀資訊、想獲得免費 DSE 學習資源?

hkdsegayau 已為你準備好!只須填妥 DSE 資源訂閱表格,便會透過電郵定期收到免費 DSE 學習資源。

這是完全免費的!


關注我們的 Instagram 動態

hkdsegayau 在 Instagram 定期分享 DSE 讀書心得、實用英文生字。

超過 13,000 位考生已經追蹤 hkdsegayau 的 Instagram 專頁了,你也不要錯過喔!


DSE 溫習筆記

與其自己花數十小時鑽研厚厚的教科書,直接溫習 hkdsegayau 的重點筆記一定更具成本效益。

現在的你願意為你的 DSE 成績、你的將來而投資嗎?


中學生閱讀計劃

致想改善英文能力、卻又無興趣看書的你:

hkdsegayau 的中學生閱讀計劃能夠解決你的痛點!

計劃包括每星期一篇英文閱讀文章、5組精選字句,助你真正 • 學習 •  終身受用的英文。