好多中五中六嘅同學都會 dm @hkdsegayau 問：我而家讀中五/中六先開始操 Past Paper, 仲追唔追得切架？小編一定會答同學：追得切！
因為… 小編自己係study leave先開始操 CE、DSE Past Paper嘅。小編係壞榜樣，同學千其唔好學。而小編有觀察過身邊考得好嘅同學嘅溫書進度，整合咗一個高中操卷時間表俾大家參考吓，幫大家可以善用 Past Paper 資源，用適合嘅方法，用最少嘅時間喺讀書方面獲得最大嘅成效。如果同學唔清楚可以喺邊度搵Past Paper嘅話，可以先睇吓小編寫嘅 CE、AL、DSE Past Paper 搜尋教學。
1. 中四：CE Past Paper By Topic
讀中四嘅同學啱啱由初中升上高中，所學嘅 DSE 考試內容並唔多，所以小編係極度唔建議同學喺呢個階段做 Past Paper By Year 嘅。
小編有呢個建議嘅第一個原因係：同學應該對科目嘅內容有基本理解，之後再做 Past Paper 去鞏固已有知識，釐清錯誤嘅概念。如果同學啱啱先學到新嘅知識已經急不及待要操 Past Paper 嘅話，就好似未學行先學走咁，操完 Past Paper 未必有作用之餘仲可能會令同學嘅思維更加混亂。
而第二個中四唔應該操 Past Paper By Year 嘅原因係：呢啲未經處理嘅 Past Paper（一陣會講咩係處理過嘅 Past Paper）入面嘅題目通常都係 cross-topic 咁出嘅。即使同學精心挑選一啲疑似啱中四程度嘅題目嚟做，呢啲題冚都好有可能係問緊中四加中五嘅topics, 同學望住條題目或者係 marking scheme 都只會睇到一頭霧水，浪費時間。再者，全份 Past Paper 入面有絕大部分題目都係根據中五中六所學嘅知識去問嘅，中四嘅同學應該未有足夠嘅知識去作答。
最後，同學啱啱先升中四，唔需要花太太太多嘅時間讀書住。小編建議大家參加多啲課外活動，砌靚自己份SLP，否則去到中六先發現自己唔夠課外活動嘅時候就好難補救架啦。
基於以上原因，小編建議同學循序漸進，中四嘅時候先做 CE Past Paper By Topic。其實小編喺上文講嘅「處理過嘅 Past Paper」就係 by topic 嘅 past paper。通常有得 by topic 嘅 past paper 都係 CE 或者 AL 嘅卷，DSE 嘅 past paper by topic 連小編都未見過（大家搵到嘅話記得話俾小編知！）呢啲卷係有心人將歷屆多年嘅 CE Past Paper 整合，再根據唔同嘅topic將題目歸類，呢啲就係 By Topic Past Paper。
同學讀中四嗰陣，可以根據學校老師教書嘅進度，每學完一個課題就做番相應嘅 CE Past Paper By Topic。當然，中四學嘅課題有啲比較淺易，CE 公開試未必會出好多，所以有啲課題冇 By Topic Past Paper 係好正常嘅（例如中四數學第一課教嘅數系 Number System 係冇 By Topic Past Paper 嘅）同學無需擔心。當同學學到其他課題，例如係 Quadratic Equation 二次方程式嗰陣，就開始會有 CE Past Paper By Topic 可以做。如果中四同學唔知道喺邊度搵 CE Past Paper By Topic 嘅話，可以睇吓小編嘅詳細 Past Paper 搜尋教學。
2. 中五上學期：CE Past Paper By Topic
雖然話中五嘅同學比起中四嘅同學大一年，但係中五嘅同學喺上學期完結之前都仲係學緊全個 DSE syllabus 內容嘅好小部分，小編建議同學無需操之過急，都係做根據學校進度做住 CE Past Paper By Topic 先。
3. 中五下學期：CE Past Paper By Topic / By Year
同學嚟到中五下學期，應該學咗 DSE syllabus 嘅一半有多。同學喺呢個時候應該繼續做 CE Past Paper By Topic, 想挑戰自己嘅話可以試吓做較早年份嘅 CE Past Paper By Year。小編建議同學由1990年嘅 CE Past Paper 開始做起，抽取一啲學校已經教咗，同學識做嘅題目嚟試吓。當然，喺呢個階段做一年嘅 CE Past Paper 對於中五嘅同學嚟講係有挑戰性嘅，同學應付唔到都無需氣餒，可以將啲 CE Past Paper 留番中六先做都唔遲（唔好唔記得小編由study leave先開始做 CE Past Paper 都倖存到！）
4. 中六：CE、DSE Past Paper By Year
中六嘅時候，同學應該學咗整個 DSE syllabus 嘅大部分。小編建議同學放 study leave 之前開始操 CE Past Paper By Year。如果中六之前已經開始做 CE Past Paper 嘅話，就可以繼續按年份順序做。如果同學啱啱開始嘅話，就可以由1990年嘅卷開始做起。由於會考嘅課程內容係比 DSE 淺少少嘅，所以同學呢個時候應該應付到 CE Past Paper 嘅大部分。(提提你：考評局已經出咗 2020 DSE Timetable 啦！小編根據 2020 DSE 時間表整合咗一個 Study Leave 備試時間表俾大家，中六嘅同學不妨睇睇～)
因為會考改制為 DSE，所以網上嘅末代會考嘅試卷資源會比較少，如果同學搵唔到最後一屆嘅 CE Past Paper 都唔緊要的，只要做到大概 2009、2010 或者 2011年嘅試卷就可以轉戰 DSE Past Paper By Year。同學做 DSE Past Paper 嘅方法同做 CE Past Paper By Year 嘅方法一樣，都係應該跟年份，順序咁做每一年嘅試卷。同學應該由 2012 DSE Past Paper 做起，一直做到最近期嘅試卷。
不過同學要注意嘅係，同學應該留番三至四年最近期嘅 DSE Past Paper 喺臨考嘅前一兩日先做，以便同學更準確估計自己考 DSE 嘅成績（小編亦都整合咗 2012 – 2018 DSE Cut Off 分數、詳細趨勢分析俾大家參考）例如同學考嘅係 2020 DSE，就可以喺中六同study leave期間先做 2012 – 2016 DSE Past Paper, 留番 2017、2018、2019 DSE Past Paper 喺考試之前先做。
Q&A: 中六同學應唔應該做 AL Past Paper?
有啲同學會覺得，要喺 DSE 考5**的話，就要操埋 AL Past Paper。如果同學有時間，又想挑戰自己的話，可以試吓喺中六教埋啲 AL topics 之後嘗試做 AL Past Paper。不過小編個人認為 AL 嘅難度比起 DSE 高更多，讀中六嘅同學要完成 AL Past Paper 並明白試卷、marking scheme 嘅內容有啲難度，所以同學覺得 AL Past Paper 太具挑戰性的話可以唔做的。其實小編攞 5* 或 5** 嘅科目都冇做過 AL Past Paper 的。
Q&A: 邊度可以搵到最齊全嘅CE、AL、DSE Past Paper?
如果同學唔清楚可以喺邊度搵到最齊全嘅 CE、AL、DSE Past Paper 嘅話，可以睇睇小編寫嘅 Past Paper 搜尋教學，小編整合咗多個 Past Paper 資源庫希望可以幫到同學！
註：小編所讀嘅選修科係：物理 Physics Phy 化學 Chemistry Chem 生物 Biology Bio，呢篇文章所分享嘅操CE、AL、DSE Past Paper時間表主要係根據以上三科，同埋數學 Mathematics Maths 嘅經驗嚟講解嘅。小編個人認為操主科中文 Chinese、英文 English、通識 Liberal Studies LS 嘅方法會有少少唔同，所以遲啲會喺其他文章分享～
訂閱免費 DSE 資源
不想錯過 DSE 考生必讀資訊、想獲得免費 DSE 學習資源？
hkdsegayau 已為你準備好！只須填妥 DSE 資源訂閱表格，便會透過電郵定期收到免費 DSE 學習資源。
這是完全免費的！
關注我們的 Instagram 動態
hkdsegayau 在 Instagram 定期分享 DSE 讀書心得、實用英文生字。
超過 14,000 位考生已經追蹤 hkdsegayau 的 Instagram 專頁了，你也不要錯過喔！
DSE 溫習筆記
與其自己花數十小時鑽研厚厚的教科書，直接溫習 hkdsegayau 的重點筆記一定更具成本效益。
現在的你願意為你的 DSE 成績、你的將來而投資嗎？